Gihatod na sa katapusang pahulayan ang 11 ka indibidwal nga nakalas sa pag-igo sa Bagyong Tino human nga gibanlas ang Barangay Bacayan ning dakbayan sa Sugbo.
Sa Talamban Cemetery, naglinya ang lubnganan sa pamilyang Yosores, Son, Betinol, ug Malinao nga naangol sa kusog nga pagbaha sa ilang lugar, ubay-ubay usab ang mga nagtinabangay sa pag-alsa sa mga lungon nga mahimutang og tarong sa ika-pito nga andana.
Atol sa pakighinabi sa Bombo Newsteam kang Bernardino Son, nawad-an og asawa ug amahan, gani sa 10 ka miyembro nga nawala, ang duha niini wala pa nakit-an ug mao pa ang gipaningkamutan sa mga sakop sa rescuers nga marekober.
Emosyonal niya nga gisaysay ang wala damha nga panghitabo ug wala silay laing nahimo kondi ang mohilak tungod sa kawad-on sa paglaom.
Gipaambit usab niini ang ulahing panag-istorya niya sa iyang ikaduhang anak nga walay hunong nga nagpahinumdom kaniya nga mag-amping kanunay.
Personal usab nga gitunol ni Cebu City Mayor Archival ang mga hinabang pinansyal ug tanang burial expenses sa mga pamilya nga anaa sa Brgy. Gym sa wala pa kini gilubong.
Sama sa nadawat nga P10,000 kada usa sa miyembro sa pamilya nga namatay.
Samtang, gihangyo usab sa Mayor ang anaa sa 500 ka mga indibidwal nga nagpuyo sa danger zone nga dili na mobalik pagtukod kay possible gihapon nga mosaka ang lebel sa tubig busa iyang giingon nga pangitaan og laing lugar nga mamahimo sila nga makatukod.
