CEBU CITY-Mamahimong ipahiling ubos sa buhatan sa Cebu City Department of Veterinary Medicine and Fisheries (DVMF) ang mga binuhing hayop nga nasakit sa mga tag-iyang walay igong kwarta ikapatambal sa ilang mga alaga.
Kini ang gipamahayag ni Dr. Alice Utlang, veterinarian ug pangu sa DVMF ngadto sa mga lungsuranon sa dakbayan sa Sugbo nga nagbuhi og mga hayop sama sa iro (dog), iring (cat), ug uban pa.
Pasalig kini sa pamunuan sa buhatan isip paghatag pagtagad sa mga kinabuhi sa mga hayop ilabi na sa higayong nagpamati na kini og sakit.
Subay pa nga usa sa mga angay buhaton sa mga tag-iya og binuhing hayop kay ilang iparehistro ang ilang mga kahayupan aron kini nasubay sa datos sa ilang bakuna, purga (deworming), ug sa general sa check-up niini nga aduna lay bayad sa P200.
Dugang pa ni Dr. Utlang nga abli ilang buhatan sa DVMF nga nahimutang sa Cebu City North Reclamation Area gikan Lunes hangtod Biyernes alas 8 sa buntag ngadto na sa alas 5 sa hapon.
