Gipahibalo sa Society of Philippine Entertainment Editors ang mga nominado para sa ika-9 nga edisyon sa The EDDYS (The Entertainment Editors’ Choice), lakip na ang hugot nga kompetisyon sa mga nag-unang kategorya sama sa Best Actress.
Gihimo ang pahibalo gahapon Hunyo 25 sa usa ka hotel sa Quezon City, nga gi-livestream usab sa YouTube.
Lakip sa mga nominado sa Best Actress category sila si Mylene Dizon para sa “Habang Nilalamon ng Hydra ang Kasaysayan,” Barbie Forteza para sa “Kontrabida Academy,” Krystel Go para sa “I’mPerfect,” Angelica Panganiban para sa “UnMarry,” Maris Racal para sa “Sunshine,” ug Charo Santos para sa “Only We Know.”
Sa Best Picture category, nakasulod ang “Bar Boys: After School,” “Eraserheads: Combo on the Run,” “I’mPerfect,” “Journeyman,” “Quezon,” “Sunshine,” ug “UnMarry.”
Mag-indigay usab alang sa Best Director award sila Sigrid Andrea Bernardo (“I’mPerfect”), Antoinette Jadaone (“Sunshine”), Jeffrey Jeturian (“UnMarry”), Christian Paolo Lat ug Dominic Lat (“Journeyman”), Kip Oebanda (“Bar Boys: After School”), Jerrold Tarog (“Quezon”), ug Maria Diane Ventura (“Eraserheads: Combo on the Run”).
Sa Best Actor category, ang mga nominado mao sila si Carlo Aquino para sa “Bar Boys: After School,” Dingdong Dantes para sa “Only We Know,” Joshua Garcia para sa “Meet, Greet & Bye,” Jericho Rosales para sa “Quezon,” JC Santos para sa “Journeyman,” ug Vice Ganda para sa “Call Me Mother.”
Samtang, sila Pops Fernandez ug Kim Atienza ang magsilbing host sa ika-9 nga The EDDYS ubos sa direksyon ni Calvin Neria.
Ipahigayon ang EDDYS Awards Night sa Hulyo 5 sa Ceremonial Hall sa Marriott Grand Ballroom, diin pasidunggan ang mga talagsaong pelikula ug personalidad sa industriya sa pelikula sa Pilipinas.
