Gisuspenso sa Office of the Ombudsman ang pipila ka mga opisyal sa Department of Public Works and Highways sa Davao Occidental nga nalambigit sa iskandalo sa pagkontrol sa baha.
Subay sa ikaduhang ‘major case’ nga gisang-at sa Ombudsman bahin sa pagkontrol sa baha, ‘preventive suspension’ ang gi-isyu sa mga opisyal nga nalambigit sa korapsyon.
Walo ka ‘opisyal sa public works’, lakip ang kontraktor nga si Sarah Discaya, ang gikasuhan og ‘Malversation of Public Funds through Falsification of Public Documents’ ug paglapas sa Section 3(e) sa Republic Act 3019 o ang Anti-Graft and Corrupt Practices Act.
Sumala ni Assistant Ombudsman Mico F. Clavano, ang suspensyon naglakip sa dili pagbayad o sweldo niining mga opisyal samtang nagpadayon ang kaso o wala pa masulbad.
Gipasakaan og kaso ang mga opisyal human ang Ombudsman nakatigom og igong ebidensya sa nadiskobrehan nga ‘ghost flood control project’ sa Davao Occidental nga gipondohan og 96.5 milyon ka pesos.
Tungod niini, gipaambit ni Ombudsman Spokesperson Clavano nga sa ‘malversation case’ nga giatubang sa mga respondents, ang prosekusyon nagrekomendar og ‘walay piyansa’ para sa kaso.
Kini nagpasabot nga kon ihatag sa korte, si Sarah Discaya dili tugutan nga makapiyansa ug magpabilin nga gibilanggo samtang gidungog ang kaso.
