ARGAO, CEBU-Nagbangutan ang lokal nga mga opisyal sa habagatang lalawigan sa Sugbo sa pagtaliwan ni Dr. Annie Irene Rufo, usa ka dentista nga nagpahinungod sa iyang karera sa pag-alagad sa mga komunidad sa wala pa ang trahedya sa usa ka makamatay nga aksidente sa dalan gahapon Lunes, Septiyembre 4.
Gipadayag ni Boljoon Mayor Jojie Derama ang ilahang pahasubo ngadtu sa pamilya ni Dr. Annie Irene Rufo, kinsa nahiagom sa makalilisang nga kamatayon sa Argao samtang padulong sa trabaho Lunes.
Matod ni Derama si Rufo gi-deploy isip community dentist sa lungsod sukad niadtong Abril ning tuiga.
Samtang sila si Provincial Board Members Raymond Calderon ug Stanley Caminero mipadayag usab sa ilang pahasubo sa pamilya ug mga higala ni Rufo.
Si Rufo namatay human ang iyang gimaneho nga sports utility vehicle (SUV) nabangga sa likod nga bahin sa trailer truck nga giparking kilid mismo sa highway sa Brgy. Bulasa, lungsod sa Argao pasado alas 5 sa buntag.
Nasayran nga ang dentista nahimong kabahin sa Central Visayas’ Dentists Deployment Project sa Department of Health (DOH), nga ang programa gitumong sa paghatag ug mga batakang serbisyo sa ngipon sa lagyong mga dapit ug mga marginalized sector.
