CEBU – Abli lang sa publiko hangtod sa alas 10 sa gabii ang mga sementeryo sa dakbayan sa Sugbo, atol sa selebrasyon sa Kalag-Kalag.
Kini ang gibutyag ni Konsehal Philip Zafra, chairperson sa peace and order committee sa Cebu City Council, nga gitugotan lang ni Mayor Michael Rama ang pag-abli sa tanang sementeryo gikan sa alas 6 sa buntag hangtod sa alas 10 sa gabii sa Nobyembre 1 ug 2.
Dugang pa, nga ang pagpahamtang sa limitasyon sa oras usa ka paagi aron masiguro ang kalinaw ug kahusay uban ang gipaabot nga pagdagsa sa daghang tawo pagkahuman sa duha ka tuig nga paghunong tungod sa pandemya sa COVID-19.
Samtang sa habig ni Police Lieutenant Colonel Mark Gifter Sucalit, deputy director for operations sa Cebu Police Provincial Office (CPPO), niingon nga ila nang gimandoan ang mga station commander sa lalawigan sa Sugbo nga makig-alayon usab sa ilang tagsa-tagsa ka local government units kabahin sa guidelines sa pagbisita sa sementeryo nga ipatuman sa ilang tagsa-tagsa ka mga dapit.
