CEBU CITY- Subli na nga ablihan sa sunod semana ang mga bag-o lang nga gi renovate nga mga pansayan sa Cebu South Bus Terminal, kini ang gibutyag ni Ahmed Cuizon, ang General Manager sa nahisgutang terminal.
Matud ni Cuizon, nga 98 porsiyento na ang nakompleto sa maong renovation, hinungdan nga possible nga mas sayu nga bahin karong buwana subli na kining ipagamit sa mga pasahero.
Gibutyag usab niini, nga ang kanhi nagdumala sa mga pansayan nga gipabayran sa mga pasahero nga mao ang Mr. Loo, anaa pa gihapon ug padayun pang nag-operate gumikan kay aduna pay nahibiling 5-ka tuig sa ilang kontrata.
Apan, gihimug-atan niini nga mas maayu kini kay aduna nay kagawasan ang mga pasahiro sa pagpili kung asa sila bout nga mogamit sa maong mga pansayan gumikan kay aduna usab managlahi nga mga pansayan alang sa mga PWDs, ug LGBTQ members.
Sigon usab niini, nga walay nagasto ang probinsiya sa Sugbo sa pagparenovate sa maong pansayan gumikan kay giangkon na sa usa ka pribadong sector ang pagpa-ayu niini.
Samtang sa pikas bahin, gipangitaan pa usab ug paagi sa Probinsiya ang pagsulbad sa problema sa mga be-hire nga nahimutang sa terminal, gumikan kay nakabalda kini sa Dagan sa operasiyon ug nakamugna ug kahuot sa mga pasahiro hilabi na sa peak season.
