CEBU – Nagpunsisok ang mga pasahero sa pantalan kaganihang sayo sa buntag sa tuyo nga maka-uli alang sa pinili-ay karung Mayo 9, adlaw nga Lunes.
Gisaysay ni Patrolman Jessie Manton, Maritime Police, nga naka-standby sila Pier 1 ug Pier 3 alang sa pagtabang sa paghatag ug assistance sa mga pasahero nga manguli sa ilahang mga probinsiya.
Matud ni Manton nga gilauman na nila ang pagdagsa sa mga pasahero gumikan sa long weekend.
Tumang ka hasol usab ang nasinati sa usa ka pasahero nga si Joel Mendez, diin matud pa, sa kadaghang tawo sa pantalan, giingong wala na’y sistema nga gipatuman.
Sigon pa, alas 6 sa buntag ang iyahang byahe, apan mi-abot na lang ug 6:50 wala sa gihapon kini makakuha sa iyahang seat number.
Gibutyag ni Mendez nga nagsagol na ang naglinya sa mga mulukat pa ug ticket, ug sa mga paingon nang mubyahe nga mukuha pa ug seat number.
Samtang, gipadayag usab ni Renila Latras nga sa nakalabay nga buwan pa kini nagpa-book ug ticket arun nga dili na kini mahasol.
Matud pa, mu uli kini sa Getafe, probinsiya sa Bohol, ug milukat kini ug advance ticket gumikan kay siya nasayod nga magdasok gayud ang mga tawo ning panahona nga ting-uli gumikan sa eleksyon.
Sigon ni Latras nga alas 3 pa lang kini sa kadlawon mitunga sa pantalan arun nga magpaabot sa iyahang byahe.
