CEBU CITY-Andam na ang mga sakop sa awtoridad sa mga nagkadaiyang mga pantalan sa Sugbo atol sa holiday season karong panahona.
Kini ang gipasalig sa mga kadagkuan sa Cebu Port Authority uban sa pakig-alayon niini sa Philippine Coast Guard (PCG), Philippine National Police (PNP), ang Maritime Industry Authority (MARINA) ug sa Department of Transportation (DOTr) diin sila mopatuman og komprehensibong hugpong sa mga lakang nga gidisenyo aron mapausbaw ang seguridad ug mapahapsay ang mga operasyon sa tanang destinasyon dinhi sa dakbayan sa Sugbo.
Gipatuman sa CPA ang “Oplan Byaheng Ayos” diin ipatuman ang pagsiguro sa luwas ug hapsay nga pagbiyahe sa mga tawo diin mao ang panahon nga daghan og mga pasahero nga mupauli sa tagsa-tagsang mga probinsya og syudad.
Sa eksklusibong pakighinabi sa Bombo Newsteam kang CPA Public Relation Officer Maryknoll Bolasa diin gitataw niini nga sa umaabot nga holiday season gitag-an nga musaka pa kini ang numero sa mga pasahero nga mudungo sa pantalan.
Giawhag sab ni Bolasa ang publiko sa gustong mubyahe og mutabok sa kadagatan nga mag pabook og advance o mupalit sa ticket daan pinaagi sa online ticketing systems aron makatabang sa pag likay sa pagdasok sa mga tawo o taas nga linya sa mga ticketing office.
Gipahimangno usab sa CPA ang publiko nga magbalantayon og daling mo-report sa matang sa pangingilad susama sa fixer og scams sa online ticketing kini subay sa ticket scalping nga supak sa balaod.
Ingon man nga adunay mga k-9 dogs nga ideploy sa tagsa-tagsang mga pantalan dugang sa seguridad sa mga pasahero hilabi na sa mga hulga sa bomb explosives sa mga pantalan.
