CEBU CITY-Gibana-bana nga mikabat sa kapin 50,000 ka mga pasahero ang natala sa Cebu South Bus Terminal nga mibyahe gikan sa Lunes hangtud sa Sabado o sa tibuok semana santa.
Gipahibalo ni Carmen Quijano, ang general manager sa Cebu South ug North Bus Terminal, nga gikan sa Lunes hangtud sa Miyerkules kay mikabat na sa 46,000 ka mga pasahero ang ilahang natala ug napun-an kini pag-abot sa Biyernes Santo ug Sabado de Gloria.
Matud pa, wala may natanggong nga mga pasahero ug naka-byahe lang tanan subay na usab sa 24 oras nga operasyon sa terminal.
Hinuon, gitino ni Quijano nga sa maong 24 oras nga operasyon kay nagpuli-puli ang mga driver arun nga dili delikado ang ilahang byahe diin posibli nga magduka ang mga driver.
Subay niini, giingong wala may dagkong kakuli-an nga nahitabo ug hapsay ug malinawon lang ang pagbyahe sa mga pasahero.
Gilauman usab ni Quijano nga subling mo sugwak karung hapon sa terminal ang mga pasahero inig mubalik na sa syudad sa Sugbo gikan sa long holidays.
