CEBU CITY-Padayon sa gihapon ang mga nabati ug nasinati nga mga pagpamomba ug ingon man ang mga pagbinayloay sa mga airstrike sa magkaatbang nga pwersa sa militantend grupo nga Hamas ug sa gobyerno sa Israeli.
Mao kini ang gibutyag ni Marc Pleños, usa ka lumad nga taga Camotes, Cebu nga anaa sa kasamtangan sa Israel atol sa eksklusibong pakighinabi sa Bombo Radyo Cebu news team ngadto kaniya.
Matod pa niini naa gihapon ang kahadlok ug kabalaka matag panahon nga makadungod siya og mga pagbuto.
Gibutyag usab niini nga nawagtangan na sa elektrisidad ug linya sa komunikasyon ang pipil ka mga dapit nga duol sa border, sa Gaza strip.
Samtang nagpadayun usab ang panagbangi sa naasoy nga militanteng grupo ug Israel, gipalig-on usab sa liboan ka mga Pilipinong naa sa Israel ang ilahang komunikasyon sa usag usa pinaagi sa pagporma og mga group chats sa social media ug social groups, kung diin, anaa pud ang presenya sa mga kawani sa Philippine Embassy sa Israel.
Kung diin, pinaagi sa maong mga group chats, padayon ang paghatod sa embahada sa mga labing ulahing kalamboan kabahin sa nagpdayong gubat ug ingon man sa mga importanteng pahimangno ug pahibalo.
Samtang, gipahibalo usab ni Pleños ang makanunayong pagsusi sa ilahang kahimtang sa mga nagpakabanang kawani sa embahada sa Pilipinas ug gani padayon sila nga gipangumusta niini ug ingon man gihatagan na sila sa mga contact numbers nga mamahimong tawagan kung ugaling man nga adunay mahitabong emerhensiya ug sa bisan unsang matang sa kakulian nga masinatian nila.
Sa pikas bahin, wala pay nadawat nga mandato ang mga Pilipinong naa sa Israel nga papaulion sa nasud ug sa kasamtangan, wala sa gihapoy “repatriation orders” gikan sa embahada.
