Dili apektado ang mga Pilipino nga anaa sa London sa nahitabong anti-immigration protests diin kapin sa 110,000 ka mga lahing puti ang nisalmot niadtong Sabado, Setyembre 13, 2025.
Mao kini ang gipaambit ni Glycer Casalmer, Bombo International Correspondent sa London, subay sa pahimangno sa Filipino community nga dili moapil sa mga protesta gumikan sa nagkandaiyang racist ug bayolente nga mga lihok-protesta.
Dugang pa niini nga luwas ra hinuon ang tanang Pilipino tungod kay legal sila nga naabot sa nasud ug kon gani adunay kuwang kay dili usab sila makakuha sa mga benepisyo sa gobyerno.
Ingon man nga naanad na usab sila sa maong mga kalihokan hilabi na nga bahin kini sa balaod sa London nga gawasnon ang mga tawo nga magpahigayon og protesta aron ipadayag ang ilang mga katungod sa pagpadayag apan ang matang sa bayolente ug dibisyon lang ang hugot nga gidili sa ilang nasud.
Kahinumdumang niulbo ang kagubot nga giorganisar ni far-right political activist Tommy Robinson diin gikataho nga ang mga pag-atake nahitabo human ang mga demonstrador sa ‘Unite the Kingdom’ martsa nakalapas sa usa ka “sterile area” nga gibutang aron mapalayo ang mga nagprotesta ug kontra-protesta.
Ingon man nga nakaangol og 26 ka mga sakop sa otoridad ug dunay 25 ka indibidwal ang nadakpan.LO
Busa, gikondenar ni Assistant Commissioner Matt Twist ang hingpit nga dili madawat nga mga pag-atake.
