Nagkadaiya ang reaksyon sa mga Pilipino sa The Hague, Netherlands kalabot sa kaso sa International Criminal Court (ICC) batok kang kanhi Presidente Rodrigo Duterte.
Sa pakighinabi sa Bombo news team kang Angel Axinto, Bombo International News Correspondent sa The Hague, iyang obserbasyon nga ang mga tigpaluyo sa kanhi presidente nagpabilin sa ilang suporta ug baruganan bisan pa sa pag-abot sa kaso sa mas taas nga yugto sa ICC proceedings.
Matud pa, nga bisan og mikunhod ang gidaghanon sa mga nagpundok kumpara sa unang mga tuig, adunay gihapon mga grupo sa The Hague nga nagpadayon sa pagpahayag sa suporta, ilabi na sa pipila ka mga pinoy nga gikan sa Davao nga giila nga sentro sa ilang mga kalihokan.
Sa laing bahin, ang mga Pilipino nga nagrepresentar sa giingong mga biktima ug pipila ka pamilya miingon nga giisip nila kini nga importante nga kalamboan, tungod kay nagpasabot kini og lakang padulong sa dugay nang gipaabot nga hustisya ug accountability.
Gipasabot usab niini, nga ang isyu nagpabilin nga sensitibo ug hinungdan sa nagkabahin-bahin nga opinyon sa publiko, diin ang uban nagtan-aw niini isip pormal nga legal nga proseso, samtang ang uban nagtan-aw niini isip isyu sa tawhanong katungod ug hustisya.
Sa pagkakaron, nagpadayon ang sunod nga pormal nga lakang sa International Criminal Court samtang ang kaso nagpabilin sa internasyonal nga lebel.
