Giangkon ni Presidente Ferdinand Marcos Jr., nga nasagmuyo ang mga Pilipino sa hinay nga serbisyo sa gobyerno gumikan wala nila kini nabati.
Ang pamahayag sa Presidente basi sa iyang nakat-onan sa miaging eleksyon.
Sa gipaambit sa Presidente nga gawas sa hinay nga serbisyo sa gobyerno, ang mga katagilungsod nabusog usab sa sobra nga kasaba sa politika.
Ingon man nga bisan ang Presidente kay aminado nga nahinayan kini sa mga proyekto, ilabina sa transportasyon, mao nga angayan lang nga paspasan ang mga proyekto nga adunay long-term nga epekto sa publiko.
Lakip sa ilang mga dagkong proyekto nga gihatagan og prayoridad mao ang turismo, panglawas, ug mga dagkong proyekto sa transportasyon.
Hinungdan nga gitinguha ni Marcos nga himuong sayon ang pagbiyahe sa mga Pilipino.
Karon nga nahuman na ang eleksiyon, ang Presidente mihangyo nga hunongon na ang paglabay sa mga akusasyon ug panahon na nga magtrabaho alang sa kalamboan sa atong nasud.
Gipasaligan ni Presidente Marcos ang mga kababayan nga buhaton sa gobyerno ang tanan aron mapalambo ang kinabuhi sa mga Pilipino.
Gihatagan og gibug-aton ni Presidente Marcos nga ang mga adunay taas nga posisyon sa gobyerno andam maminaw sa mga reklamo.
Misaad usab kini nga ilang ipatuman ang dinaliang mga solusyon aron maibanan ang pag-antos sa mga katagilungsod.
