CEBU – Gitawag sa usa sa mga manlalaban sa Sugbo nga “kinolokoy” ang patakaran nga gipatuman sa National Inter-Agency Task Force for the Management of Emerging Infectious Diseases (IATF-MEID).
Usa si Atty. Clarence Paul Oaminal lakip na si Atty. Valentino Bacalso, Jr ug si Atty. Benjamin Cabrido ang niduso ug special civil action, Petition for Declaratory Relief sa Regional Trial Court sa syudad sa Sugbo kagahapong adlawa.
Gihangyo sa maong mga manlalaban ang hukmanan nga dili mapatuman subay na sa pag-kwestiyon sa ‘validity’ sa IATF Resolution No 114 nga naghatag sa mga protocols alang sa inbound international travelers sa nasod lakip na sa Sugbo.
Matud ni Atty. Oaminal nga dugay na nga naumol ang IATF sa panahon pa ni kanhi Presidente Benigno Aquino III ug gipadayon na lang kini sa kasamtangang administrasyon karon panahon sa pandemya.
Isip Chairman sa IATF ang buhatan sa Department of Health (DoH) ang modumala sa pagpatuman sa mga guidelines may labot sa panlawas sa tibuok nasod apan molanat lang kini sa unom ka buwan.
Human niini mamahimo na nga himuon sa Local Government Unit subay sa Batakang Balaod sa Local Gov’t Code, ang mga pama-agi alang sa dapit nga ubos sa hurisdiksiyon niini.
Gidugang ni Oaminal nga gumikan sa local autonomy, ilabi na karong panahon sa pandemya, trabaho na sa lokal nga pangagamhanan ang pagpatuman sa unsa man ang makaayo sa kinabag-an sa lokalidad.
Subay sa gidusong petisyon, malaumon ang manlalaban nga mahimong instrumento ang Korte Suprema alang sa maong sitwasyon.
Samtang gihimug-atan usab niini nga mamahimo lang nga mawala ang bili sa usa ka provincial ordinance kung adunay mopasaka niini ug mokwestiyon sa Korte Suprema.
Gihagit ni Atty. Oaminal ang National IATF nga kwestiyunon ang kasamtangang ordinansa sa Probinsiya sa Sugbo nga nagpatuman sa ‘swab upon arrival policy’ sa mga international travelers lakip na sa returning Overseas Filipinos ug mga OFWs nga motugpa sa Mactan Cebu International Airport, sukwahi sa kasamtangang gipatuman sa National IATF.
