CEBU CITY — Pakusgan pa sa Commission on Population and Development (POPCOM)-7 ang ilang programa ngadto sa matag pamilya, bisan pa man sa hagit nga dala sa coronavirus disease pandemic.
Kini taliwa na sa gilaumang “baby boom” kon daghang mga batang mahimugso sa katapusang bahin sa tuig tungod sa gipatumang mga lockdown.
Unang nakita sa pagtuon gikan sa University of the Philippines Populations Institute (UPPI) ug United Nations Populations Fund (UNPFA) nga moabot sa 2.5-million ang unplanned pregnancies sa buwan sa Disyembre ngadto na sa Enero.
Wala hinuon gikonsiderar ni POPCOM-7 Director Atty. Bruce Ragas nga usa ka matang sa pagti-aw apan nakita niini nga seryoso ang maong figures gikan sa maong pagtuon.
Atol sa launching sa mobile application sa POPCOM-7, nagkanayon si Atty. Ragas nga anaa pirmi ang maong ahensya aron alagaran ang mga ginikanan sama lang sa mga family planning programs.
Gibarugan usab niini nga kanunay silang nag-innovate alang sa paghatag og serbisyo ngadto sa matag pamilya.
Niadtong nakalabay nga adlaw, gilusad sa PopCom-7 ang ilang “Family Planning Mobile Application” sa tumong nga maka-access ang publiko sa mga family planning products.
Dugang pa ni Ragas nga anaa pirmi ang ahensya alang sa mas responsableng pagbaton og pamilya.
