CEBU CITY-Nipahigayon og rally ang mga membro sa lain-laing progresibong grupo sa Sugbo nga gipangulohan sa BAYAN-Central Visayas sa ika-51 nga anibersaryo sa deklarasyon sa Martial Law Huwebes, Septiyembre 21, 2023.
Kung diin ang mga unyon sa mga mamumuo, kabatan-onan, ug estudyante nga nakabase sa Sugbo nagdala sa ilang tawag nga bannering, “Martial Law Kaniadto, Terror Law karon.”
Ang martsa sa protesta nilungtad og halos tulo ka oras, sugod sa Fuente Osmeña ug nitapos sa downtown sa Colon Street, Cebu City.
Mihunong usab ang mga raliyista atubangan sa Police Regional Office in Central Visayas (PRO-7) compound, diin ilang gibutangan og props nga nagrepresentar sa mga patayng lawas nga gitabonan sa itom nga garbage bag.
Matud pa ni Jaime Paglinawan, chairperson sa BAYAN Central Visayas, nga usa sa ilang gipadayag sa protesta karong tuiga mao ang confidential funds sa Office of the Vice President (OVP).
Gawas pa niana, si Paglinawan niingon nga ang laing panawagan nga gipadayag sa mga raliyista mao ang pagpanghasi, pagpangatake, pagdagit ug uban pa.
Tungod sa mga taho sa pagpamatay, ilabi na sa pagdagit sa duha ka environmentalist sa Bataan karong buwana, gusto ni Paglinawan nga wagtangon ang National Task Force to End Local Communist Armed Conflict (NTF-ELCAC).
Kung kahinumduman ang gobyerno ang nag-organisa sa NTF-ELCAC aron pakigbatok sa komunistang rebelyon sa Pilipinas.
Dako ang pagtuo ni Paglinawan nga ang NTF-ELCAC nahimong instrumento sa pagpanghasi.
