CEBU CITY — Gipa-relibohan ang upat ka mga pulis nga nakita sa viral video nga gituohang nangulata sa sakop sa fraternity nga Alpha Kappa Rho (AKRHO).
Matod ni Lapu-lapu City Director PCol. Carlito Baja kasamtangan nga anaa sa Admin holding ang nahisgutang mga pulis samtang nagpadayon ang gipahigayon nga imbestigasyon kabahin sa nahitabo.
Giila ang mga gipangrelibuhang police officers nga silang: Police Staff Sergeant Adrian Yunting, Police Master Sergeant Rodrigo Inok, Police Staff Sergeant Dexter Albario, ug Police Corporal John Paul Sojor.
Nagkanayon si Baja nga adunay nightly activity subay sa kapistahan sa Birhen sa Regla ug nakadawat sila ug police assistance gumikan adunay nahitabong kagubot. Mi-responde ang kapulisan ug didtu nahitabo ang maong insedente.
Matod pa usab ni Baja niduol ang sakop sa Akrho ug posible nga gusto muapil sa maong kagubot human gidakop sa kapulisan ang nagmugna niini.
Sigon pa usab sa City Police Director nga gihapak sa sakop sa Akrho ang pulis sa dala niini nga karton samtang ang usa ka kabuan niini mi-kwelyo sa usa ka pulis.
Dugang pa ni Baja nga wala masugod sa sinugdanan sa panghitabo ang nakita sa nag-viral nga video kung diin anaa unta didto ang pagpanghapak sa membro sa Akrho.
Samtang gihimakak ni Baja nga walay myembro sa Tau Gamma Phi sa sakop sa kapulisan nga mi responde sa maong insedente.
Gipasakaan na og upat ka kaso ang mga dinakpan kagahapong adlawa. (Lahvi Quiñones)
