CEBU – Mokabat sa 4,824 ka persons with disability (PWDs) gikan sa 39 sa 80 ka barangay sa dakbayan sa Sugbo ang naka-claim na sa ilang P2,000 nga financial assistance alang sa mga buwan sa Hunyo ug Hulyo 2022.
Matod sa Cebu City government Public Information Office, nga ang maong numero gibase sa field reports sa Cebu City Department of Social Welfare and Services (DSWS) nga naka-collate sa unang adlaw sa pag-apod-apod sa financial assistance niadtong Martes, Agosto 23, 2022.
Nasayran nga mokabat sa 13,337 ka benepisyaryo gikan sa 80 ka barangay sa dakbayan ang angayan nga mo-claim sa ilang cash assistance o katumbas sa kinatibuk-ang P26,674,000 nga pundo.
Kadtong dili maka-claim sa ilang cash assistance atol sa ikatulo hangtod sa kataposang adlaw sa distribution, Agosto 27, 2022, kinahanglang mo-claim sa ilang financial assistance sa Cebu City Treasurer’s Office, wala na kinahanglana ang authorization letter sa mga representante sa PWD nga mo-claim sa hinabang alang kanila, apan gikinahanglan lang nga magpakita sila og valid ID ug pirmahan ang payroll.
