CEBU CITY-“Lisod matud pa pasabton ang katawhan nga sirado na ang panghuna-huna”.
Kini ang pamahayag ni Cebu City Health Officer Dr. Daisy Villa,nga ekslusibong nahinabi sa Bombo Radyo Cebu human sa nahitabong init nga diskusyon kagahapong adlawa, Pebrero 23,2020 sa Brgy. Taptap kalabot sa plano sa City Gov’t nga ibutang sa Cebu City Resource Management and Development Center (Cremdec) ang mga Person under monitoring (PUM).
Refer to the video on this link: https://www.facebook.com/BomboRadyoCebu963/videos/643885489740261/
Matud ni Dr. Villa nga dili na siya mu-rekomendar nga seminaron pa ug pasabton ang naasoy nga mga residente niining puntoha sanglit mas mitoo naman kini ug nakatutok sa social media–sa sayop nga impormasyon.
Hinoon, gitino ni Villa nga dili pa daghan ang PUM ug wala pa sila’y gibutang sa Cremdec,apan kung mudaghan na ang mga PUM, mutugot man sa dili ang residente sa Brgy. Taptap ibutang gyud kini sa naasoy nga pasilidad.
Mensahe sa city health officer sa mga nagkadaiyang barangay nga kinahanlang makakuha gyud sa saktong impormasyon ug nunot niini andam sila nga mupahigayon og mga seminar ug meeting para sa pagpaabot og saktong kasayoran aron malikayan ang miscommunication.
Gitataw usab ni Villa nga wala’y kamatooran ang mga mikatap nga impormasyon nga dunay nagpositibo o dunay mga lugar nga gi-cordon gumikan kay dunay nagpositibo sa COVID-19 kini mao matud pa ang gilikayan nga mahitabo sa city gov’t ug sa Cebu Province.
Nasayran nga wala na napun-an ang nagpositibo sa COVID-19 sa nasud ug wala usab namatay gumikan niini.
