TALISAY CITY, CEBU-Gipanglantawan karon sa kagamhanang dakbayan sa Talisay nga maghimo usab og residential-based earthquake drill agig paghatag og kahanas ilabi na sa panahon sa linog.
Kini maoy girekomendar ni Talisay City Councilor Danny Caballero, kinsa Chairman sa Committee on Disaster Resiliency sa konseho sa dakbayan sa Talisay diin mao kiniy bunga sa panagpulong niya kang Alvin Santillana, ang pangu sa Talisay City Disaster Risk Reduction and Management Office (CDRRMO).
Dugang pa ni Caballero nga ang pagpatuman og earthquake drills sa mga tunghaan kay usa ka ehemplo sa epektibong aksyon nga nindot mapatuman sab sa mga panimalay.
Asoy pa niini nga possible kining mapatuman bisan og kaduha lang sa matag tuig aron adunay igong kaalam sa kaluwasan ang mga anaa sa panimalay sa panahon sa delubyo.
Kahinumduman nga niadtong milabayng buwan sa Enero kay adunay linog nga miigo diin ang epicenter anaa sa Leyte apan nakasinati gihapon og kusog nga pagtay-og sa yuta ang lalawigan sa Sugbo.
