CEBU CITY — Gireklamo sa usa ka molupyo sa Brgy. Tapon, Dumanjog Cebu ang kapitan gumikan sa matod pa paglapas niini sa guidelines sa pagpanghatag sa cash aid sa Special Amelioration Program sa gobyerno.
Eksklusibo nga gipa-abot ni alyas Susan sa tulumanong Bombo Hanay Bigtime sa Bombo Radyo Cebu ang reklamo batok kang Brgy Tapon Kapitan Vicente “Londong” Fernandez gumikan sa pagbu-ot buot matod pa niini nga bahinon sa upat ka pamilya ang P6,000 nga nadawat sa ig-agaw sa reklamante isip hinabang sa SAP sa gobyerno.
Gi-asoy ni alyas Susan nga Biyernes sa udto niadtong nakalabay’ng semana sa dihang nang-apod-apod ang taga DSWD sa SAP sa Brgy Tapon diin sa mao usab nga adlaw, hapon sa maong adlaw’ng Biyernes, niadto matod pa si Kapitan Fernandez sa panimalay sa ig-agaw sa reklamante og gikuha ang P6,000 aron bahin-bahinun sa upat ka pamilya.
Gihimong rason matod pa sa Kapitan mao nga naka-budget na matod pa ang maong mga kantidad nga gipang-apod-apod.
Nibutyag pa gyud matod pa ang kapitan nga andam kining mo-atubang sa taga DSWD kun aduanay reklamo og kun ipatawag kini.
‘Sharing is caring gud’
Midepensa ang kapitan sa Brgy. Tapon, lungsod sa Dumanjug, Cebu sa reklamo sa usa ka konstituwente kalabot na sa giingong pagbahin-bahin sa P6,000 nga hinabang sa gobyerno ubos sa social amelioration program.
Matud ni Fernanded nga nangutana ang mismong residente kung mahimo bang ibahin-bahin ang hinabang sanglit “sharing is caring” ug misugot sila.
Gihimug-atan sa kapitan nga wala niya gibahin-bahin ang kwarta aron maigo apan misugot kini nga pwedeng bahin-bahinon sa pamilya ang maong hinabang.
Wala hinuon namugos si Fernandez sa pagbahin-bahin sa kwarta inay pag-awhag lang gayud kini.
Tungod niini, imbestigaran ni Dumanjug Mayor Gungun Gica ang maong reklamo diin iyang ipatawag ang mga sakop sa Municipal Social Wefare Office sa usa ka meeting.
Matud ni Gica nga manubag si Kapitan Fernandez kung mapamatud-an ang maong pasangil.
Klaro ug tataw alang sa mayor nga wala gitugot sa balaud ang pagtunga-tunga sa hinabang sa gobyerno. GIN/GBS
