Nangayo og relocation site ug housing assistance ang pipila ka mga residente sa Purok Tangkong 1 ug 2 sa Barangay Hagnaya, San Remigio, Cebu, human makita ang mga liki ug hinay-hinay nga pag-ubos sa yuta sa ilang lugar nunot sa magnitude 6.9 nga linog nga miigo sa amihanang Sugbo niadtong Septiyembre 30, 2025.
Matud sa mga residente nga ang mga bahin sa ilang komunidad sa baybayon nagsugod na sa pagkaunlod, nga nakadugang sa ilang kabalaka sa dugang nga kadaot sa mga residente.
Nasayran nga pipila ka mga residente sa Purok Tangkong 1 ug 2 ang temporaryong namalhin sa taas nga bahin sa Hagnaya apan wala magpuyo sa tent city nga gitukod sa siyudad ug nasudnong kagamhanan.
Ubay-ubay usab sa mga residente ang nagduha-duha sa permanenteng pagbalhin tungod kay kadaghanan kanila nagsalig sa pagpangisda o pagtrabaho sa duol nga pantalan alang sa ilang panginabuhi.
Samtang, nangayo usab og tabang ang lokal nga kagamhanan sa nahisgutang lugar sa National Government kabahin sa isyu sa relokasyon sa mga residente.
Nipadayag usab ang Department of Human Settlements and Urban Development andam sila motabang pinaagi sa mga programa sa pabalay niini, apan giangkon sa buhatan nga kinahanglan pa kini ug taas nga panahon.
