CEBU – Padayon gihapon ang pagpanakop sa mga sakop sa City Environment and Natural Resources Office (CENRO) ug Cebu Environmental Sanitation and Enforcement Team (Ceset) sa mga residente sa Sugbo nga milapas sa mga pampublikong lagda sa Sugbo ingon man kadtong pakyas sa pagmintinar sa kalimpyo sa ilahang tagsa-tagsa ka tugkaran.
Gani, gibutyag ni Grace Luardo ang pangu sa Ceset nga sukad niadtong petsa uno sa buwan sa Oktubre niabot na sa kapin sa 240 ang ilahang nadakapan.
Nagkanayon si Luardo nga sa usa ka adlaw makasikop sila og kapin sa 20 ka indibidwal gumikan sa managlahing kalapasan sama nalang sa mga pataka og labay sa basura, pakyas sa paglimpyo sa ilahang mga tugkaran ingon man ang pagpanigarilyo sa mga pampublikong lugar.
Gitino nga Luardo nga bisan tuod nga adunay uban nga supak sa ilahang gibuhat apan gihimug-atan niini mas nindot tan-awn ang hapsay nga sidewalk og dili ikauwaw kung maagian og bisita gumikan limpyo kini ug walay basura.
Ang padayon nga lakang sa mga hingtungdang buhatan sa kalimpyo nahisubay sa gitinguha ni Cebu City Mayor Mike Rama nga mamahimong sama sa nasod nga Singapore ang dakbayan sa Sugbo.
