Andam ang pipila ka mga senador nga mag-overtime aron mapadayon ang impeachment trial ni Vice President Sara Duterte.
Matod ni Senador Panfilo Lacson, kadaghanan sa mga senador sa majority bloc andam nga magpahigayon sa regular nga sesyon sa buntag, samtang igahin ang hapon hangtod gabii alang sa impeachment trial.
Gikan sa kasamtangang oras nga alas 10 sa buntag hangtod alas 2:30 sa hapon, gisugyot nga ibalhin ang impeachment trial sa alas 2:30 sa hapon hangtod alas 7:30 sa gabii sugod sa sunod bulan.
Mahimo usab nga ipadayon ang trial hangtod alas 11 sa gabii o tungang gabii aron matuman ang kasabutan nga usa ka saksi kada adlaw.
Matod ni Lacson, mahimong ipatuman ang bag-ong iskedyul sa sunod semana aron mahatagan ang mga senador og igong panahon sa pagpresentar sa mga saksi nga gi-assign kanila.
Kaniadto, gi-adjourn ang impeachment hearing alas 3 sa hapon aron mahatagan og panahon ang regular nga sesyon sa Senado.
Giingon ni Lacson nga misugot usab ang pipila ka mga senador sa minority bloc sa maong gisugyot nga kausaban sa iskedyul.
Giklaro hinuon ni Lacson nga mahimong mausab ang bag-ong iskedyul depende sa kahimtang ug sa dagan sa impeachment trial.
Gilauman nga ipahibalo sa Senado ang pinal nga iskedyul sa impeachment trial sa Lunes o Miyerkules.
