Giawhag ang publiko nga mag-alerto sa kaso sa leptospirosis tungod sa epekto sa Bagyong Tino, nga nagdala og kaylap nga pagbaha sa tibuok nasud.
Kini human nga ang mga awtoridad sa panglawas nagpaabot sa posibleng pagtaas sa mga kaso sa leptospirosis.
Hilabi na nga aduna kini seryosong mga risgo kon dili matambalan dayon ug mahimong makamatay, partikular na sa mga indibidwal nga adunay huyang nga immune system.
Ang leptospirosis usa ka impeksyon sa bakterya nga kasagarang makita sa tubig nga kontaminado sa ihi sa nataptan nga mga hayop, labi na ang mga ilaga.
Gipahinumdoman sa mga doktor ang publiko nga likayan ang pag-agi o paglubog sa tubig baha, ingon man nga sa bag-o nga kalamidad lisod kini nga likayan tungod sa pagsaka sa lebel sa tubig baha.
Apan, bisan paman niana gitambagan ang
adunay mga samad o garas sa ilang mga tiil nga likayan ang pagtunob sa tubig baha aron malikayan ang impeksyon, tungod kay kini nagdugang sa risgo sa leptospirosis.
Agig tubag, gimando ni Gobernador Pamela Baricuatro sa Cebu ang paghimo sa Cebu Provincial Leptospirosis Task Force aron motabang ug magmonitor sa mga kumpirmadong kaso sa sakit.
Sila ang manguna sa mga operasyon sa emerhensya, pagpahigayon sa koordinar sa case triage ug mga referral sa ospital pinaagi sa Rural Health Units (RHUs) ug local government units (LGUs), ug pagsiguro sa diha-diha nga pagtambal.
Siguruhon usab niini nga ang mga giya sa Department of Health (DOH) ug ang mga giya sa mga kauban nga institusyon nga gisunod sa husto.
