CEBU CITY- Duol sa kasingkasing sa bag-ong napili nga Santo Papa ang mga sugbuanon, ilabi na ang debosyon sa mga Cebuano’s sa Balaang bata nga si Senior Santo Niño.
Kini ang gipaambit ni Rev. Fr. Eusebio Berdon, OSA Prior, Sto Niño Sprituality Center sa Tolotolo,Consolacion,Cebu,atol sa pakighinabi sa Bombo News team kaniya, kabahin sa iyahang “personal experience” kauban si Robert Francis Cardinal Provost, nga karon gipili isip ika-267 nga lider sa Simbahang Katolika nga si Pope Leo XIV.
Gidugang niini, nga ang Bag-ong Santo papa, adunay malumo nga kasingkasing sa Cebu, sa pagkatinuod sa diha nga nagkita ang Pope ug si Cebu Archbishop Jose Palma, nangumusta kini sa mga sugbuanon ug sa ilahang Debosyon.
Gipaambit usab ni Fr. Berdon, nga personal niyang nahimamat si Pope Leo XIV niadtong 2004 atol sa iyang pagbisita sa Sugbo isip Prior General sa Augustinian Order.
Kung diin, iyaha usab nga gibendisyonan ang Augustinian Friary sa Mohon, Talisay City,Cebu.
Mibisita usab siya sa Intramuros niadtong 2010, diin iyang gisaulog ang Misa sa San Agustín Church atol sa Order of Saint Augustine’s Intermediate General Chapter.
Gibutyag ni Fr. Berdon nga ilahang giimbitar si Pope Leo XIV nga mangulo og Misa alang sa kasaulogan sa anibersaryo sa Augustinian Province of Cebu niadtong Enero 15, 2025, atol sa Santo Niño novena, apan nibalibad tungod sa iyang mga responsibilidad sa Vatican.
Bisan pa niini, mainiton nga gihangop sa Augustinian community sa Sugbo ang inagurasyon sa Santo Papa, nga gipasigarbo nga siya ang labing unang Augustinian nga pari nga nangulo sa Simbahang Katoliko.
