OSLOB, CEBU- Gipasakaan na og kaso sa kapolisan sa Oslob Police Station ang upat (4) ka mga suspek nga milugos sa 15-anyos nga batang babaye nga namatay pipila ka adlaw human sa insidente sa lungsod sa Oslob, Cebu niadtong Disyembre 9, 2024.
Kini ang gipahibalo ni Police Major Jude Cebrero, ang hepe sa Oslob Police Station sa ekslusibong pakighinabi sa Bombo Newsteam diin gipasakaan na og kasong kalapasan sa RA 11628 o “Statutory Rape” ang mga suspek sa gang-rape nga giilang si ‘Chris’ ‘, ‘Tres’ ug ‘Ken,’ nga ilang nasikop sa lungsod sa Dalaguete niadtong Sabado, Disyembre 21.
Gitataw niini nga resulta kini sa ilang gilusad nga imbestigasyon sa nahisgutang krimen aron mahatagan ug hustisya ang pamilya sa biktima.
Dugang pa, adunay usa ka saksi nga nakakita sa usa ka 15-anyos nga babaye nga giduol sa grupo sa mga lalaki ug gipainom og ilimnong makahubog atol sa pagsaulog sa kapistahan sa maong lungsod.
Gisaysay sa saksi nga human sa pagpa-inom biktima gidala kini sa usa ka dapit diin giingon sa 5-anyos nga nimata nalang siya nga wala nay sapot.
Mao usab kini ang nakit-an sa kapulisan, dihang ilang gitakdo ang CCTV footage duol sa crime scene.
Tungod usab sa CCTV footage, ilang nakit-an ang usa ka babaye nga mitudlo ug miila sa mga lalaki diin ang unang duha nadakpan sa Barangay Tuba, duol nga lungsod sa Dalaguete sa habagatang bahin sa Sugbo ug mitudlo usab sa laing duha ka mga suspek.
Kalabot niini, giawhag ni Major Cebrero ang publiko nga mag-amping samtang likayan ang pagpakatap og sayop nga impormasyon o espekulasyon.
Samtang, nagpaabot pa sila sa resulta sa autopsy sa Regional Forensic Unit sa Police Regional Office sa mga nahipos nga specimen nga gipadala sa Camp Crame alang sa histo-pathological ug toxicological examinations, aron masuta ang eksaktong hinungdan sa kamatayon sa biktima.
