CEBU CITY-Gikatakdang gub-on ang kapin 633 ka mga depektibong timbangan karong buwan sa Agosto sa buhatan sa Office of the City Markets sa kagamhanang dakbayan sa Sugbo.
Matod pa ni Cebu City Market Administrator Robert Barquilla nga ang mga timbangan nga ilang gikatakdang gub-on kay kadtong mga depektibo ug wala lukata niadto pang tuig 2022 hangtud kini sa niaging buwan sa Hulyo 2024.
Dugang pa sa opisyal nga uban sa maong gikatakdang pagguba ang presensya ni Cebu City Acting Mayor Raymond Alvin Garcia diin pinetsahan kini sa umaabot Agosto 19.
Sumala sa datos sa Office of the City Markets, 297 ka mga timbangan ang ilang nasakmit niadtong 2022; 230 ka buok niadtong 2023; ug 104 sa Enero hangtud sa Hulyo karong tuiga.
Kabahin niini, gipahimangnoan ni Barquilla ang mga manindahay nga magtinarong ug dili gyud magbinoang sa ilang pagpaninda.
Gipadayag usab sa opisyal nga kung makita nila nga repeat offender na ang manindahay kabahin sa sakto ug regulated nga calibration sa timbangan, mahimo nga temporaryong dili na sila tugotan sa pagpaninda ka kamerkadohan sa tibuok dakbayan sa Sugbo.
