CEBU – Daghan gihapon sa mga ginikanan sa dakbayan sa Sugbo ang naglisud sa pagpadayon sa pagpatungha sa ilang mga anak sa kolehiyo ilabi na sa mga nasinating sa pandemya ug mga bagyong nangagi.
Subay niini, giawhag ni Vice Mayor Dondon Hontiveros, ang chairperson sa Committee on Education sa dakbayan, ang mga ginikanan nga dunay gipatungha sa Grade 12, ma-pribado man o sa pampublikong tunghaan, nga mopahimulos sa scholarship program sa lokal nga panggamhanan.
Bukas ang buhatan sa Cebu City Committee on Education alang sa mga ginikanan nga magpakisusi sa mga rekisitos alang sa scholarship program.
Dako na kaayo kini nga abag sa mga ginikanan sa pagtungha sa ilahang mga anak gumikan gawas nga libre ang bayranan sa kolehiyo mohatag sab ang siyudad og allowance matag buwan sa mga batang eskolar.
