Nakadawat na sa ilang hinabang pinansyal nga nagbalor sa P5,000 ang mga drayber sa tricycle sa Sugbo ug Bohol human gilusad sa Department of Social Welfare and Development – Central Visayas (DSWD-7) ang ilang payout sa 10 ka syudad sa rehiyon niadtong Miyerkules, Abril 8, 2026.
Sumala sa pakighinabi sa Bombo Radyo Cebu News Team kang DSWD-7 Regional Director Shalaine Marie Lucero nga nahimong maayo ang agi sa ilang pag-apod-apod sa hinabang pinansyal alang sa 15,766 drayber sa tricycle sa rehiyon nga apektado sab sa krisis nga gisagubang sa sektor sa transportasyon.
Dugang pa sa opisyal nga sa mga drayber nga wala makalukat sa ilang ayuda kay magtakda sila og laing schedule aron makuha nila kini basta masiguro lang ang tukmang rekisitos ug ang ilang pangalan kay anaa sa masterlist nga mugna gikan sa ilang mga lokalidad.
Gipasabot sab ni Director Lucero nga wala pa silay ideya kung adunay bay second tranche sa financial assistance apan kung adunay mando man gali ang ilang national office kay ipahibalo dayon nila kini.
Laing schedule para sa payout sa mga drayber sa tricycle alang sa mga munisipalidad sa rehiyon kay gitakda sa Abril 16 ingon man para sa mga jeepney draybers kay itagana sa Abril 21-24 ug para sa mga taxi, delivery riders, ug uban pa nga giendorso sa LTFRB kay gitakda sa Abril 28-30 subay sa scheduling matrix sa DSWD Central Office.
Kahinumduman nga ang DSWD-7 kay nagpahigayon og payout sa financial assistance sa mga syudad sa Tagbilaran, Cebu City, Lapu-lapu, Mandaue, Bogo, Carcar, Danao, Naga, Talisay, ug Toledo.
