CEBU CITY – Gipirmahan na ni Cebu City acting Mayor Michael Rama ang Executive Order (EO) 138 kung diin nagtugot sa mga ‘indoor dinings’ sa mga restaurants, ingon man personal care services alang sa mga vaccinated nga mga indibidwal.
Nakalatid sa maong EO nga gitawag ug “Oplan Puyo 9-2-7” nga ang mga kan-anan nga nag-operate ug outdoor dine-in services (al fresco) ang maka-silbi ug hangtud sa 50% sa ilahang kapasidad, samtang indoor dine-in services ang tugotan hangtud sa 10% nga kapasidad apan alang lang sa mga customer nga nabakunahan batok COVID-19, samtang ubos pa sa Modified Enhanced Community Quarantine (MECQ) ang dakbayan sa Sugbo.
Gidugang sa maong kamandoan nga ang mga personal care services, sama sa mga beauty salon, barbershop, beauty parlor, ang gitugotan nga maka-operate ug hangtud sa 30% nga kapasidad apan sa gihapon alang lang sa mga customer nga bakunado na batok COVID-19.
Gitataw usab sa maong EO nga ang maong establisimento ang nagkinahanglan ug Protocol Compliance Certificate (PCC) nga gi-isyu sa Emergency Operations Center (EOC), ingon man nga ang mga empleyado o mga staff, gikinahanglan nga vaccinated na usab.
Gibutyag ni Rama nga ang maong EO ang mahimong epektibo sugod kagahapong adlawa hangtud na sa Setyembre 7 ning kasamtangang tuig, gawas na lang kung lugwayan pa ang MECQ status sa syudad.// SBR
