CEBU PROVINCE-Gitugotan ni Gobernador Gwendolyn Garcia ang mga van-for-hire (v-hire) drivers ug operators nga makabalhin sa Cebu South Bus Terminal (CSBT) human gipapahawa sa ilang temporaryong transport terminal sa Junquera Street, Barangay Kamagayan, dakbayan sa Sugbo niadtong Biyernes, Abril 28, 2023.
Usa ka bakanteng luna sa likod nga bahin sa CSBT maoy gamiton nga sub-terminal sa mga v-hire nga moadto sa Simala sa lungsod sa Sibonga, Toledo City, Naga City, Moalboal ug Pinamungajan, ug uban pang mga dapit sa habagatang Sugbo.
Kahinumduman nga ang mga apektadong drayber ug operator nakigtagbo kang Garcia sa Kapitolyo niadtong Miyerkules, Mayo 3, aron mangayo og tabang kaniya.
Pagkasunod adlaw, Mayo 4 gahapong adlawa, gimanduan ni Garcia ang manager sa CSBT nga si Carmen Quijano nga i-orient ang mga drayber ug operator sa mga polisiya sa terminal ug unsaon paggamit ang beep card system nga gipatuman.
Ang 7,000 sq.m. lote nga gipanag-iya sa Cebu City Government sa Kamagayan temporaryong gigamit nga terminal sa mga v-hire sulod sa pito ka tuig hangtod nga gisirad-an niadtong Biyernes.
Gibutyag ni Quijano nga ang mga v-hire driver kinahanglang mobayad og P150 matag abot sa terminal.
Ang pag-parking sa tibuok gabii mokantidad og dugang P50.
Adunay dul-an sa 240 ka mga v-hire nga nag-operate sa mga rota nga mopaingon sa habagatang Sugbo, apan 20 ngadto sa 30 lang niini ang ma-accommodate sa CSBT.
