Subsob na ang pagpangandam sa mga nagkadaiyang ahensya sa gobyerno, lakip na ang Philippine Red Cross subay na sa nagsing-abot sa ika 461 nga kapistahan sa Se or Sto Niño.
Gani, aduna nay 6 ka mga ambulansya ang gipahamtang ug giandam na sa Philippine Red Cross Cebu Chapter niadtong Enero 8 lakip na sa Lapu-Lapu City Red Cross Chapter kay apil man usab sila sa augmentation sa Cebu Chapter.
Mao kini ang gikabutyag ni Atty. Maria Vera De Jesus, ang Chapter Administrator sa PH Red Cross Cebu atol sa ekslusibong pakighinabi sa Bombo Radyo Cebu Newsteam kaniya, diin iyang gidugang nga sa karon, aduna nay 200 ka mga volunteers nga ipang-deploy depende sa mga aktibidad matag adlaw.
Gitataw usab ni De Jesus nga maong gidaghanon usab sa mga volunteers ni-agi na sa skill enhancement, nga nagpasabot, nag-agi na sila og training.
Gipasigarbo usab ni De Jesus ang emergency field hospitals sa PH Red Cross nga naghatag og kasigurohan sa mga deboto atol sa Sinulog nga tungod sa mga responders nga ilang gipakatap, nga dili lang mga skilled-responders, apan fully-equipped usab.
Gitataw usab niya nga lakip sa ilahang i-deploy mao ang mga on-foot patrollers aron masiguro ang kaluwasan ugaling adunay insidente nga motumaw, bisan paman nga lisud sudlon sa ambulansya ang mga vacinity atol sa dinagkoay nga kalihokan.
