CEBU CITY-Mi-isplikar sa iyang pulong-pulong atol sa unang adlaw sa lokal nga pagpangampanya si kanhi Cebu City Mayor Michael “Mike” Rama nga ang Kamatayon ray makapapugong sa iyang paglansar pagbalik pagka-mayor sa dakbayan sa Sugbo.
Kini ang mga istoryang gibuhian ni Rama atol sa Opening Salvo Local Campaign Rally sa iyang politikanhong pundok nga Partido Barug Bag-ong Sugbo sa Barangay San Nicolas Proper niadtong Biyernes, Marso 28, 2025.
Matod pa niini nga pinaagi ra sa iyang pag-ampo ang nakapakusog sa iyang pagtuo nga mupadayon sa pagpangampanya nga daw ang kamatayon ray makapugong sa iyang kandidatura.
Kasayrang nga nag-atubang na sab og laing labad sa ulo sa mata sa balaod si Rama tungod sa bag-ong gipagawas nga desisyon sa Office of the Ombudsman nga naghukom sa iyang ikaduhang dismissal order tungod sa alegasyong anomalosong pag-award sa kontrata sa garbage disposal niadtong hinapos sa kabagsik sa Bagyong Odette nga miigo sa Sugbo.
Pinetsahan ang maong kamanduan sa Ombudsman niadtong Enero 3, 2025 apan nasapublikar lang sa bag-ohay.
Gawas ni Rama kay laing lima (5) ka mga opisyales ang nalakip sa maong silot nga mga miyembro sa Bids and Awards Committee sa kagamhanang dakbayan nga mao sila Liezl Jacobe Calamba, Lyndon Bernardo Jao Basan, Conrado Acha Ordesta III, James B. Ponce, ug Dominic Amigable Diño.
Kahinumduman ang niadtong Mayo 2024 kay gisuspenso si Rama sulod sa unom (6) ka buwan tungod sa kasong adinistratibo sa wala pagpangsweldo sa pipila ka mga trabahante sa City Assessor’s Office samtang pag-Septiyembre 2024 kay gi-dismiss kini sa kasong nepotismo sa pagtudlo sa iyang mga bayaw (brother-in-law) sa pwesto sa City Hall nga parehong giluwatan sa Ombudsman.
