Gipahibalo sa usa ka elite unit sa militar sa Madagascar nga nakuha niini ang gahum sa panggamhanan pagkahuman gi-impeach sa mga parliamentarians si Presidente Andry Rajoelina.
Namulong sa gawas sa palasyo sa presidente, ang hepe sa CAPSAT nga si Col. Michael Randrianirina nga miingon nga ang militar magtukod og gobyerno ug magpahigayon og eleksyon sulod sa duha ka tuig.
Matod niya nga bungkagon usab nila ang mga demokratikong institusyon sama sa Senado, High Constitutional Court, High Court of Justice, High Council for the Defense of Democracy and the Rule of Law ug ang Independent National Electoral Commission.
Giingon usab sa hepe sa militar nga ang mga nagprotesta sa Gen Z mahimong bahin sa pagbag-o tungod kay ang kalihukan naporma sa kadalanan ug kinahanglan nga respetuhon ang ilang mga gipangayo.
Samtang, ang mga sundalo ug mga nagprotesta nagsaulog sa pagpalagpot ni Presidente Rajoelina, uban sa liboan ka mga tawo nga nagwarawara sa ilang mga bandera sa kaulohan nga Antananarivo.
Ang CAPSAT, o Personnel Administration ug Technical and Administrative Services Corps, mao ang labing gamhanang yunit sa militar sa Madagascar.
Kaniadtong Martes, Oktubre 14, ang korte sa konstitusyon sa Madagascar nagngalan sa hepe sa militar isip bag-ong lider sa nasud, apan ang buhatan ni Presidente Rajoelina nag-ingon nga ang interim nga presidente nagpabilin nga nagdumala ug gisaway ang gitawag nga “attempted coup d’état.”
