CEBU CITY — Gihimug-atan ni Commission on Elections (COMELEC) Provincial Election Supervisor Atty. Lionel Castellano nga katungod sa mga Filipino nga makapartisipar sa pang-gobyerno aron makapili og kinsa ang buot nga magdumala sa nasod Pilipinas.
Kini pina-agi sa katungod usab nga makabotar pina-agi sa pagparehistro.
Hinuon lakip usab sa maong katungod nga nakalatid sa balaod mao ang ‘right not to vote’.
Apan segon pa niini nga isip Filipino magsilbi nga ‘equalizer’ alang sa tanan ang pag’exercise sa katungod nga makabotar alang na usab sa kaugmaon.
Gipasabot ni Atty Castellano nga nakadepende ang future sa usa ka indibidwal sama na lang sa usa ka millenial kung kinsa og unsa nga klase sa leader ang magdumala sa Pilipinas ilabi na ang pagtarong sa ekonomiya sa nasod.
Kini ang usa sa sitwasyon kung ngano nga angayan matod pa nga manginlabot sa magdumala sa pangagamhanan.
Subay niini, gipaningkamutan sa COMELEC Provincial Office nga makab-ot pa ang mga batan-on alang sa pagpasabot sa mga katungod ilabi na ang pagbotar sa election nga mapatigayon sa Pilipinas.
Nasugdan na sa buhatan ang pagkab-ot sa mga estudyante alang niini dungan usab sa nagpadayon karon nga pagdawat og mga magparehistro sa COMELEC.
Gikumpirmar usab ni Atty. Castellano nga ubos pa sa karon ang ihap sa mga first time voters ilabi na kay apektado sa pandemya ang pipila ka operasyon sama sa outside registration.
Hinuon wala matod pa’y hunong usab ang ahensiya alang sa pag-asikaso sa mga magparehistro.
Gi-awhag niini ang publiko ilabi na ang mga buot mo-transact sa COMELEC nga abli kanunay ang buhatan Martes ngadto sa Sabado, diin kinahanglan nga mo-obserbar ang motransact, sa health standards batok sa COVID-19.
Hangtod lang sa Setyembre 30 ang registration alang sa wala pa makapa-rehistro.
