Namalik na sa ilang mga balay ang minilyon ka mga nibakwit human ang mga pasidaan sa tsunami gitangtang sa tibuok Pasipiko usa ka adlaw human ang 8.8-magnitude nga linog miigo sa baybayon sa Kamchatka peninsula sa Russia.
Nag-aghat kini sa mga temporaryo nga pagbakwit gikan sa Japan hangtod sa Hawaii, Chile, ug Ecuador, diin ang mga balud kay gilauman nga moabot og 4 ka metros niatong higayona.
Sa Japan, dul-an sa duha ka milyon nga mga tawo ang gipabakwit ug temporaryong gipabakwit usab ang Fukushima nuclear plant.
Usa ka babaye sa Japan ang gikataho nga namatay human ang iyang sakyanan nahulog sa pangpang samtang nagbakwit.
Ingon man sa Chile, kapin sa 1.4 ka milyon nga mga tawo ang gipabakwit ug giisip kini sa gobyerno nga pinakadako nga pagbakwit sa kasaysayan niini.
Sa Galápagos Islands, gamay ra nga pagtaas sa lebel sa dagat ang natala ug ang kahimtang dali nga nabalik sa normal.
Kasamtangan, ang labing grabe nga kadaot ang gitaho sa rehiyon sa Severo-Kurilsk sa Russia, diin gibaha sa tsunami ang usa ka pantalan ug gilubog ang usa ka pabrika sa lugar.
Natala usab nga nibuto ang Klyuchevskoy volcano human sa linog.
Sumala sa US Geological Survey, ang linog usa sa 10 nga labing kusog sa kalibutan sukad sa 1900, ug adunay 59% nga posibilidad sa usa ka aftershock nga mas kusog kaysa 7 nga magnitude sa sunod nga semana.
