CEBU CITY — Gikalipay ni Cebu City Mayor Edgardo Labella ang hapsay nga pagpahigayon sa santos nga misa sa mga simbahan sa dakbayan sa Sugbo ubos sa modified general community quarantine (MGCQ).
Kini human nga gitugutan sa kagamhanan sa dakbayan ug sa Inter-Agency Task Force (IATF) ang 50 percent capacity sa mga manimbahay sa sulod.
Sa statement sa mayor nga gi-post sa iyang Facebook page, gipasalamatan niini ang mga tinugyanan sa simbahan, ingon man sa Archdiocese of Cebu sa pagpatuman sa mga lagda sa kwarantina.
Samtang hugot usab nga gibantayan, matud pa, sa mga sakop sa kapulisan ang palibut sa simbahan sa posibilidad nga magkagubot.
Nanghinaut si Labella nga magpadayon ang naangkon nga kalampusan taliwa sa nagkagrabeng hagit nga dala sa COVID-19 pandemic, diin inubanan kini sa pag-ampo ngadto sa labaw’ng makagagahum.
“Dako ning kalambuan sa atong hinay-hinay na nga pagbalik sa atong mga naandan nga kalihokan. Manghinaot ko nga inubanan sa atong hiniusang pag-ampo, magpadayon ang atong paglampos ining atong pakigbatok sa kasamtangang krisis,” sigon pa ni Labella. /gn
