CEBU CITY- Mikunhod ang mga deboto nga misalmot sa Penitential Walk for Jesus karung tuiga kini human nga anaa ra sa 160,000 ang ihap karung tuiga, aduna kini pagkunhod gikan sa 300,000 sa 2023 ug 200,000 sa 2024.
Bisan pa sa pagkunhod sa turnout ug sayo sa kabuntagon nga ulan, ang paglakaw-usa ka importante nga kalihokan sa ika-460 nga Fiesta Señor nga selebrasyon nagsugod sa alas 4 sa buntag.
Sugod sa Fuente Osmeña Circle, ang mga deboto nagdala og imahe sa Balaang Bata subay sa 2.1 ka kilometro nga rota paingon sa Basilica Minore del Sto. Niño, natapos alas 5:32 sa buntag.
Sa pikas bahin, malinawon ug hapsay kini matud pa ni Police Col. Antonietto Cañete, City Director sa Cebu City Police Office nga walay krimen, sama sa pickpocketing, ang nataho atol sa prosesyon gikan sa pagsugod hangtod sa pagkahuman.
Samtang nagmalampuson ang kalihokan sa natad sa seguridad ug kahapsay, si Cañete miila sa mga lugar nga angayan nga pauswagon.
Siya miingon nga duha ka oras sa wala pa magsugod ang Walk with Jesus, ang tanan nga gi-assign nga mga pulis, lakip ang mga nagdumala sa seguridad sa dalan ug pagkontrol sa mga tawo, nakabutang na.
Ilang gipaneguro nga di makalapas ang mga deboto sa mga dapit nga gi-cordon sa rota.
Bisan paman sa kapin sa 1,000 ka mga pulis ang gipakatap sa tibuok rota sa prosesyon ug sulod sa Pilgrim Center sa Basilica Minore del Sto. Niño, ang opisyal niingun nga nag-request gihapon sila og augmentation sa kapulisan nga gikan sa Probinsya sa Bohol nga anaa sa 500 kapin nga gipaabot nga moabot karung adlawa January 10, 2025.
Tumong niini, nga mamintinar ang kahapsay ug kalinaw sa Dakbayan ilabi na nga gipaabot sa mga organizer sa Sinulog 2025 nga modoble ang gidaghanon sa mga manambong kaysa miaging tuig nga kalihukan human kini gibalik sa Cebu City Sports Center (CCSC)./
