Cebu City-Naghatag og beauty tips ang Miss Philippines Earth 2014 nga si Jaime Herell para sa mga gustong mamahimong maanyag, sexy ug presentable sa pagsugat sa Pasko.
Sa ekslusibong pakighinabi sa Bombo Radyo Cebu kang Herell, gitambagan niini ang mga kababayn-an nga dili mag “overboard” sa ilang mga make up kung mutambong og party ilabina ang pagtambong sa misa. Matud ni Herell nga mas in karon ang “no make up look” tungod kay mas fresh kining tan-awon.
Giingon usab niya nga mas maayo nga dili nalang magsul-ob og mga puwa nga sinina karong pasko tungod kay common na kini. Mas maayo nga musuway usab og laing color sama sa green ug gold.
Dugang usab sa beauty queen nga maayo nga mangayo usab og tambag sa mga higala ilabina sa mga babae nga medyo bus-ok kung unsay mas mubagay nila nga sinina ug kung unsa ang isul-ob tungod kay matud pa magdepende man kini sa sinina,sa tipo sa lawas ug sa mutana-aw niini.
Bisan paman, gihimug-atan ni Herell nga dili man gyud kalabot lang sa pagkamaanyag ang pagsa-ulog sa pasko. Angayan matud pa nga komportable ka sa imong isul-ob ug kinahanglan nga confident kay adunay confidence ang usa ka babae sigurado nga mulutaw ang kaanyag niini.
