Gisalikway sa Moro Islamic Liberation Front o kon MILF ang hangyo nga appointment ni Presidente Ferdinand “Bongbong” Marcos kang Abdulraof Macacua isip bag-o nga Bangsamoro Autonomous Region in Muslim Mindanao (BARMM) Interim Chief Minister.
Giklaro sa Moro Islamic Liberation Front (MILF) Central Committee nga wala kini mosuporta sa pagtudlo ni Presidente Marcos ni Abdulraof “Sammy Gambar” Macacua isip Interim Chief Minister (ICM) sa Bangsamoro Transition Authority (BTA), nga sukwahi sa mga pamahayag sa mga grupo nga nagpaluyo sa maong lakang.
Sa usa ka opisyal nga pahayag human sa usa ka Consultative Assembly, ang MILF Central Committee mipahayag nga ang pagtudlo kay nakalapas sa Bangsamoro Organic Law (BOL) ug sa Comprehensive Agreement on the Bangsamoro (CAB), diin ang duha naglatid nga ang transition period kinahanglang pangunahan sa MILF.
Ila usab nga gitumbok nga sa 41 ka mga pangalan nga ilang gi-endorso alang sa BTA, kay 35 lang ang gitudlo ni Marcos Jr., hinungdan nga nabalaka sila sa tinuod nga tuyo sa gobyerno.
