Milingkod na sa Cathedra si Most Rev. Alberto “Abet” S. Uy atol sa iyang installation Mass sa Cebu Metropolitan Cathedral karong adlawa, Setyembre 30, 2025.
Ang Cathedra maoy lingkuranan o trono sa obispo diin nagsimbolo sa iyang otoridad sulod sa archdiocese.
Mitambong usab sa Solemn Canonical Possession and Installation sila si His Eminence Luis Antonio Cardinal Tagle, Most Rev. Charles John Brown, ang Apostolic Nuncio to the Philippines, ingon man si Cebu Archbishop-Emeritus Jose Palma kinsang mga nangulo ug nihatag og mensahe.
Matud ni Cardinal Tagle, wala nangita ang Ginoo og susama sa usa ka celebrity inay nangita kini og instrumento nga mobuhat sa sugo sa Ginoo nga dili mabayran.
Sa mensahe usab ni Cebu Archbishop-Emeritus Jose Palma nga uban sa installation sa bag-ong Arsobispo, gidapit niini ang tanan sa paghangop sa kahigayunan alang sa panaghiusa ug pagtubo sulod sa komunidad.
Busa, giawhag usab niini ang tanang mga taga dakbayan sa Sugbo nga hangupon ug ipadayag ang mainit nga gugma ngadto kang Archbishop Uy.
Ingon man nga nipasalig kini kang Uy nga iya siyang dali nga maduolan.
Samtang, sa mensahe ni Most Rev. Charles John Brown, gihangyo niini ang Sugboanon sa paghigugma, pag-ampo, pagtahud, ug pagtabang sa bag-ong Arsobispo.
Kini gumikan gidawat niini ang mando gikan sa Balaang Amahan aron sa paggiya, magbalantay ug pangunahan ang paglakaw paingon sa dalan sa mga santos.
Katapusang nihatag og pasalamat si Cebu Archbishop Alberto Uy diin nisaad kini nga ihatag niya ang iyahang ‘best’ aron ipadayag ang gugma sa Ginoo ngadto sa mga Sugboanon ug pag-alagad kanila paingon kang Kristo.
Gipaambit usab niini ang unang reaksyon sa dihang nakadawat og tawag gikan kang Pope Leo XIV nga siya ang gitudlo isip bag-ong Arsobispo sa dakbayan.
Matud niini nga nag-panic siya ug dili makatuo, ingon man nga gatuo si Archbishop Uy nga usa ka scammer ang nanawag sa iyaha apan sa dihang iyang nakaila sa tingog, ayha na niya naamguhan ang dakong kausaban sa iyang kinabuhi.
