Prangka nga giingon ni U.S. President Donald Trump nga ang sunod nga supreme leader sa Iran kinahanglan una nga aprubahan sa Estados Unidos, kay kon dili, dili siya magdugay.
Mao kini ang tubag ni Trump sa dihang gipangutana, diin iyang giinsistir nga importante alang sa U.S. nga sigurohon una nga ang Iran dili makabaton og oportunidad sa pagpalambo og nuclear weapon sa umaabot.
Dugang pa sa presidente sa Amerika nga gusto niyang malikayan ang susama nga kaagi nga naangkon sa Iran human sa pagpamomba sa U.S. sa tulo ka pasilidad sa nukleyar sa Iran niadtong Hunyo 22, 2025.
Sa dihang gipangutana kon aprubahan ba niya ang usa ka lider nga adunay koneksyon sa kanhing rehimen, si Trump miingon nga mahimo niya kini kon sa iyang hunahuna ang kandidato mahimong usa ka maayong lider.
Ingon man nga ang Iran giingong adunay plano nga kontrolon ang tibuok Middle East, usa ka butang nga gihimug-atan ni Trump nga gipugngan sa Amerika
“They are a paper tiger… Their plan was to attack the entire Middle East,” ingon niya.
Wala usab gisalikway ni Trump ang posibilidad nga ang U.S. magpadala og mga espesyal nga pwersa aron kontrolon ang enriched uranium sa Iran. Sumala sa usa ka senior nga opisyal sa administrasyon, ang Iran adunay igo nga uranium aron mahimong materyal nga weapons-grade sulod sa 10 ka adlaw.
Kadaghanan sa uranium gituohan nga naa sa mga pasilidad nga gibombahan ubos sa Operation Midnight Hammer, lakip ang mga nuclear site sa Natanz Nuclear Facility, ang Isfahan Nuclear Technology Center, ug ang Fordow Fuel Enrichment Plant.
Wala usab naghatag ang presidente og piho nga timeline kung kanus-a matapos ang gubat, bisan kung giingon niya nga ang operasyon sa U.S. “nauna sa iskedyul” sa panahon ug kusog sa opensiba sa nasud.
Bisan pa sa pagsaka sa presyo sa gasolina tungod sa mga tensyon sa rehiyon, gitawag ni Trump ang sitwasyon nga “usa ka gamay nga glitch.” Gipanghambog usab niya ang giingong dakong kadaot nga nahimo sa militar sa Iran, lakip na ang giingong pagkaguba sa navy, air force, ug mga sistema sa komunikasyon niini.
