CEBU CITY — Gipalawman karon sa Lapu-Lapu City PNP ang imbestigasyon sa pagpamusil-patay sa usa ka barangay councilor sa may Brgy. Poblacion, dakbayan sa Lapu-Lapu.
Matud sa hepe sa Lapu-Lapu City Police Station 3 nga si Police Major Jose Angelo Acupinpin nga gisubay karon sa mga sakop ang trabaho ug personal nga kinabuhi ni Brgy. Mactan councilor Sandro Augusto.
Kahinumdumang gipusil sa wala mailhing riding-in-tandem niadtong Setyembre 19 sa gabii si Augusto diin iya untang apason ang asawa nianang panahona.
Nakaangkon og samad-pinusilan ang konsehal sa iyang dughan nga maoy hinungdan sa hinanaling kamatayon niini.
Dugang pa ni Acupinpin nga wala masuta sa pamilya kung aduna bay gikaaway ang konsehal ug wala usab kini makadawat og hulga sa kinabuhi.
Subay na sa manhunt operation, mitanyag si Lapu-Lapu City Mayor Junard “Ahong” Chan og P1-million nga ganti alang sa makasikop sa nagpatay kang konsehal Augusto.
