CEBU CITY – Patay ang usa ka motorcycle driver human nga mabangga sa mibalintong nga pribadong sakyanan sa South Road Properties (SRP) sa dakbayan sa Talisay.
Giila ang namatay nga si Marjun Paragoso, 26 anyus, ug residente sa Inayagan, dakbayan sa Naga, probinsiya sa Sugbo.
Sa pakighinabi sa Bombo News Team ni Patrolman Ricky Abarquez, ang police investigator sa Talisay PNP, gisaysay niini nga paingun sa habagatan nga bahin sa Sugbo ang sakyanan nga gimaneho ni Kurt Joseph Año, 26, sa dihang wala niini makontrolar ang manubela gumikan sa kakusog sa dagan hinungdan nga milimbuwad kini ug nalagpot.
Matud ni Patrolman Abarquez nga kasugat sa maong sakyanan sa pikas nga lane ang biktima nga nagpaingun usab sa dakbayan sa Sugbo hinungdan nga nadamay kini sa maong aksidente.
Giingung gumikan sa kakusog sa impact, nabungkag ang motorsiklo sa biktima ug nalagput usab kini ug mao ang hinungdan sa iyahang hinanaling kamatayon.
Gidala sa tambalanan ang drayber sa sakyanan gumikan sa naangkun nga samad ug bun-og sa nagkadaiyang bahin sa kalawasan.
Kasong reckless imprudence resulting to homicide ang atubangon ni Año. |SBR
