CEBU CITY-Patay ang usa ka motorcycle rider human mabanggaan sa usa ka Toyota Hiace sa may Talaga, Argao kaganihang buntag.
Naila ang namatay nga si Ramonilo Rollon, residente sa Cabancalan, Mandaue City.Samtang ang driver sa van type nga sakyanan giilang si Manolet Arizala, 39 anyos ug residente sa Brgy. Banawa niining dakbayan.
Matud ni Police Staff Sergeant Howard Manoypas sa Argao PS nga padulong si Rollon sa Amihanang bahin samtang padulong sa Habagatang area si Arizala.
Wala matud pa nabantayi niini nga duna siyay kasugat sanglit blind curve man ang nahitaboan. Nalagpot ang driver sa motor ug napasok ang motor sa hood sa sakyanan.
Gidala sa tambalan ang driver sa motor apan gideklarar na kining dead on arrival.
Nakadetain na usab sa Argao PS ang driver nga si Arizala samtang nakig-areglo sa kabanay sa namatay.
Gihuwat pa kini sa kapulisan kung mupasaka ba og kaso ang pamilya o i-settle nalang ang nahitabo.
