Nakalas ang usa ka 36-anyos nga lalaki human nawad-an og kontrol sa iyang gimaneho nga motorsiklo sulod sa SRP Tunnel, pasado alas 11:57 sa gabii niadtong Sabado, Septiyembre 12, 2026.
Giila ang biktima nga si June Diaz Delgra, 36, lumad nga taga-Digos City, Davao del Sur, ug residente sa Upper Mohon, Talisay City.
Sumala sa imbestigasyon sa Traffic Enforcement Unit sa Cebu City Police Office, ang biktima ug ang iyang kauban nagbiyahe paingon sa Talisay City human sila migawas gikan sa usa ka gasoline station.
Base sa pahayag sa iyang kaubanan niini, nga nag-una siya sa biktima sa sinugdanan. Sa dihang misulay si Delgra sa pag-overtake kaniya samtang nagsubay sa gamay nga kurba sulod sa tunnel, gikatahong mibalhin siya sa wala nga bahin apan kalit nga nawad-an og kontrol sa motorsiklo.
Midausdos ang motorsiklo, hinungdan nga nalagpot ang biktima ug giguyod og pipila ka metros uban sa motorsiklo una pa kini nabangga sa kanal daplin sa dalan.
Tungod sa kakusog sa impact, nakaangkon ang biktima og grabeng mga samad sa iyang ulo ug lawas.
Dali siyang gidala sa Cebu City Medical Center (CCMC), diin gideklarar siya nga patay na pag-abot sa maong tambalanan.
