CEBU – Patay ang usa ka motorista human nga nalatayan ug dump truck sa Department of Public Service (DPS).
Giila ang namatay nga si Kent Duterte, hamtong ang panuigon, residente sa Sitio Kolo, Barangay Lahug, dakbayan sa Sugbo.
Gisaysay ni Police Corporal Roy Ceniza sa Talamban Police Station, nga pulos nagpaingon sa susama nga direksyon ang mga nalambigit sa dihang nahitabo ang disgrasya.
Matud pa, mi-overtake si Duterte sa nag-bisikleta nga si Dovil Pening, 36 anyos, ulitawo ug taga Cadahuan, Talamban.
Apan giingong nasabod sa motor ang bisikleta hinungdan nga nangatumba ang duha.
Sa ilahang pagkatumba, naatol nga mitadlas usab sa susamang direksyon ang garbage truck sa DPS nga gimaneho ni Benjamin Morga, 56 anyos, minyo ug taga Biasong, Bonbon, syudad sa Sugbo.
Sigon pa sa pulis, naligsan sa truck ang nag-motorsiklo diin na-igo kini sa ulo hinungdan sa hinanali niining kamatayon.
Ang nag-bisikleta ang nakaangkon lang ug gamay nga samad.
Gikustodiya na karun sa Talamban Police Station ang driver sa DPS ug sa nagbisikleta.
