Gipadayag ni Cesar Ian Molina, Nurse II sa Department of Health (DOH), nga ang sayop nga impormasyon o misinformation nga mikatap sa social media ang usa sa mga pangunang rason kon ngano nga daghang mga ginikanan ang nagbalibad nga pabakunahan ang ilang mga anak.
Sumala ni Molina, basi sa gipahigayon nga daily Regional Inter-Agency Task Force (IATF) meeting kauban ang mga team leader nga gipakatap sa nagkadaiyang dapit sa rehiyon—lakip na sa Bohol, Cebu Province, ug mga Highly Urbanized Cities—nasayran nga dako kaayo ang epekto sa mga post ug video sa social media sa desisyon sa mga ginikanan.
Bisan pa man sa padayon nga paningkamot sa DOH pinaagi sa health teaching, pag-edukar, ug mga advocacy campaign bahin sa kaayohan sa bakuna sama sa MR vaccine, daghan gihapon nga mga ginikanan ang nagdumili ug nagbalibad tungod sa ilang mga nabasahan ug nakita sa internet.
Gumikan niini, padayon ang panawagan sa kagamhanan sa publiko nga magmatngon ug sigurohon nga gikan sa mga kasaligang tinubdan o opisyal nga mga ahensya sa panglawas ang impormasyon nga ilang gituohan aron maprotektahan ang panglawas sa mga kabataan.
